8 баланын энеси, 97 жаштагы Сүйдү апа: "Биринчи баламды 30 жашымдан кийин төрөгөм"

"Биринчи баламды 30 жашымдан кийин төрөгөм", - деди SUPER.KG порталына Ысык-Көл облусундагы Тоң районунун тургуну, "Баатыр эне" наамынын ээси (8 баланын энеси), 97 жаштагы Сүйдү Кыдырбаева.

"1952-жылы турмушка чыгып, кеч төрөдүм. 8 баламдын үчөөсү эркек, бешөөсү кыз. 30 неберем, 40 чөбөрөм бар. Ардагер абышкам 90 жашында кайтыш болгон. Балдарымды эмгекти сүйүүгө үйрөтүп тарбиялагам: бирин аркама көтөрүп, экинчисин астыма көтөрүп орок оргом, апийим кыргам. Өзүм эмгекчил болгом, балдарым да мени тартып эмгекчил. Тоң районунда мен иштебеген иш калган жок. Согуш убагында Балыкчы-Быстровка темир жолунун курулушунда иштегем, Боом капчыгайындагы курулуштарга колум тийген. Балдарым аман-эсен, бала-чакалуу, небере-чөбөрө күтүп жатышат. Улуу кызым 64тө. Балдарымдын баары жогорку билимдүү", - деди Сүйдү апа.