СУПЕРСТАН: Энелер күнүнө карата уюштурулган сынактын жеңүүчүлөрү аныкталды

SUPER.KG порталынын "Суперстан" бөлүмүндө Энелер күнүнө карата колдонуучулар өз ара "Энелердин эрдигин даңазалай..." аттуу сынак уюштурушуп, жеңүүчүлөрдү аташты.

Сынак 11-апрелде башталып, ал 4 шарттын негизинде жүрдү. Жыйынтыгында аягына чейин катышкан жана колдонуучулар тарабынан эң көп добуш алган колдонуучулар жеңүүчү аталышты. Сынакта акчалай байгелер сайылып, шарт боюнча, байгелер жеңүүчүлөрдүн энелерине ыйгарылды.

Сынактын жеңүүчүсү Topcubai аттуу колдонуучубуз өзүнүн баянында: "Менин балалыгым Советтер Союзунун кыйрашы, жаңы эгемендүүлүктү алган жылдарга туура келди. Бардык колхоз, совхоздор жоюлуп, алдым-жуттум заманда чоңойдум. Ошондой болсо да апакем мени бирөөнүн аманатына кол салбоого, бирөөнүн эмгегин жебөөгө, бирөөгө жамандык кылбай, түз жолдо жүрүүгө үйрөттү", - дейт.

Ал эми 2-орунга татыган Гука аттуу колдонуучу балалык баёо сезим менен эненин баркын түшүнбөгөнүн, өзү кош бойлуу болуп, тогуз ай бооруна бала көтөрүп, толгоо тартып, наристесин колуна алып, эне болгондо гана баарын жон териси менен сезгендигин айтат: "Кыздарым сыркоолоп калса санаа баскан көздөрүмө уйку келбей, жыгылып кетсе жүрөгүм "болк" этип үзүлчүдөй, ыйласа жан дүйнөм эңшерилип, сыздаганда энемдин баа жеткис эмгегин түшүнө алдым. "Бейиш эненин таманынын астында" деген сөз жөн айтылган эмес. Ким бейишти кааласа, энесин ыйлатпасынчы".

3-орунду ээлеген Kg.lady аттуу колдонуучу "айкөлдүгү жанда жок, мээрими чыгыш менен батышка жеткен, кучагы бейпилдикке толгон, таманына бейиш багын катып алган, жөпжөнөкөй эненин перзентимин" дейт.

Сынактын жалпы мазмуну менен таанышуу үчүн бул жакка кириңиз.