Былтыркыдай кырсыктын алдын алуу максатында Ала-Букада ата-энелер, окуучулар жана мугалимдер катышкан чоң жыйын өткөрүлөт

Эртең Ала-Бука районунда ата-энелер, окуучулар жана мугалимдер катышкан чоң жыйын өткөрүлөт. Бул тууралуу бүгүн, 17-майда SUPER.KG порталына Ала-Бука райондук ички иштер бөлүмүнүн өспүрүмдөр менен иштөө боюнча инспектору Рано Нематтуллаева билдирди.

"Окуу жылынын аяктап бараткандыгына байланыштуу Акыркы коңгуроо салтанатына карата ата-энелер, мектеп окуучулары жана мугалимдер катышкан чоң жыйын өткөрөбүз. Өткөн жылы Акыркы коңгуроо салтанатында окуучулар жол кырсыгына кабылып каза болушкан. Ошондуктан түшүндүрүү иштерин жүргүзүп, кырсыктын алдын алуу максатында чогулуп жатабыз", - дейт Р.Нематтуллаева.

Белгилей кетсек, өткөн жылы Ала-Бука районунда бүтүрүү кечесин белгилеп жаткан окуучулар 22-июнь күнү жол кырсыгына кабылып, 2 окуучу, 1 оператор жигит каза болгон.