Орусиялык белгилүү актёр Марат Башаров спектаклде роль ойноо үчүн Бишкек шаарына келди

Бүгүн, 18-майда орусиялык белгилүү актёр Марат Башаров Бишкекте маалымат жыйынын өткөрдү. Анда актёр Бишкек аны өзгөчө абасы менен тосуп алганын айтты. "Сиздер менен көрүшүп жатканыма, түбүбүз бир мусулман эл экенибизге кубанычтамын. Бүгүн таңга маал Бишкекке учуп келдим. Москванын абасын билесиздер да, ал эми Бишкектин абасы өзгөчө таза экен. Тамактары даамдуу, кыргыз эли боорукер, меймандос калк экен", - деп билдирди.

Кыргыз эли менен татар эли тууралуу актёр: "Биз боордош, бир тууган эл экенибизге дайыма кубанычтамын", - деди.

Марат Башаровдун маалымат жыйынында чакырылган коноктордун арасында орусиялык диний ишмер, Москва мемориалдык мечитинин имамы, ислам дин аалымы жана ислам темалары боюнча бир нече китептин автору Шамиль Аляутдинов да болду.

Актёр 18-майда Эл аралык музейлер күнүнө карата коюлуп жаткан "Разговор с душой" спектаклинде башкы каармандын ролун ойнойт.