Бишкекте жеңил унаа май куюучу жайды сүзүп оодарылып, 6 адам ар түрдүү жаракаттарды алды

Бишкек шаарында жеңил унаа май куюучу жайды сүзүп, оодарылып кетти. Бул тууралуу бүгүн, 19-майда “Тез жардам” кызматынан билдиришти.

Маалыматка ылайык, 19-майга караган түнү саат 03:25 чамасында Шабдан баатыр жана Чүй кең көчөсүнүн кесилишинде жол кырсыгы катталган. Анда жеңил унаа аталган май куюучу жайды сүзүп, оодарылып кеткен. Унаада болжол менен 20-28 жаштагы 6 адам болгон, алардын бири 20 жаштагы кыз. “Тез жардамдын” кызматкерлери окуя болгон жерге барып, ар түрдүү жаракаттарды алган жабырлануучуларга алгачкы медициналык жардам көрсөтүп, андан кийин ооруканага жеткиришкен. Алдын ала маалыматтарга ылайык, унаанын ичиндеги 6 адамдын баары тең мас абалда болгон.