ОНЛАЙН: Бишкекте "Мегатой" кинокомедиясынын бет ачары болуп өттү (фото)

15:50. "Мегатой" кинокомедиясынын бет ачары болуп өттү. Турмуштагы окуялар, кыргыздардын үйлөнүү тоюндагы кызыктар, салттар тамаша аркылуу көрүүчүлөргө жеткирилет. Тасмада үйлөнүп жаткан эки жигиттин бирөөсү достору менен адашып, той болуп жаткан башка үйгө барып калышат. Кызыктын баары дасторкондогу тамак-аштар желип, көрүндүккө делген акчанын баары түгөнгөндө башталат. Тойго чыныгы күйөө бала достору менен келгенде үлпөт көйнөкчөн кыз кайсы жигитти тандаарын билбей туруп калат...

"Мегатой" кинокомедиясы бүгүндөн баштап өлкөбүздөгү бардык кинотеатрларда көрсөтүлөт.

14:55. Тасма үйлөнүү той тууралуу. “Жашың 30дан ашты, үйлөн” деп Бакыт аттуу башкы каармандын тааныбаган эле кызга үйлөнүүгө макулдугун алышат. Ошентип, той башталат. Учурда тасмада үйлөнүү тоюндагы кызыктуу салттар көрсөтүлүп жатат.

14:20. Алып баруучулар тасмада роль жараткандардын баарын чакырганда тартуучу топтогулар сахнага ырдап чыгышты. Сахнада режиссёр Сүйүн Откеевге каалоо-тилектер айтылып, бата берилген соң тасманы көрсөтүү башталды.

14:15. Бүгүн, 19-майда Бишкектеги "Манас" кинотеатрында "Мегатой" кинокомедиясынын бет ачары өтүп жатат. Ага тасманын жаратуучулары, атайын чакырылган коноктор, медиа өкүлдөрү келишкен. Алып баруучулар Азамат Исмаилов менен Максат Надырбеков сахнага тасманын режиссёру Сүйүн Откеевди чакырышты. Режиссёр кинокомедия болгон окуянын негизинде тартылып, тартуучу топтогулардын баарына ыраазычылык сөзүн айтты.