7 жашар Даниэлдин өлүмүнө күнөөлүү деп табылып, 25 жылга эркинен ажыратылган аял райондук соттун өкүмүнө макул болбой шаардык сотко кайрылды

1-класстын окуучусу Даниэлдин өлүмүнө күнөөлүү деп табылып, 25 жылга эркинен ажыратылган Майрам Акунованын Биринчи Май райондук сотунун өкүмүнө макул болбой шаардык сотко кайрылган даттануусунун негизинде иш кайра каралмак. Бирок анын жактоочусу соттук отурумда болбогонуна байланыштуу соттук кароо 23-майга жылдырылды.

Маалым болгондой, 7 жаштагы баланы өлтүрүүгө күнөөлүү деп табылган А.Акунова өз күнөөсүн моюнуна албай, Биринчи Май райондук соту аны 25 жылга эркинен ажыратуу боюнча чыгарган өкүмүн кайра кароону өтүнүп экинчи инстанциядагы сотко кайрылган. Соттук кароо Бишкек шаардык сотунун судьялары Н.К.Эсеналиев, А.Ж.Момуналиев жана Н.А.Ильязованын кароосунда каралмакчы.

Эскерте кетсек, 1-апрель күнү Биринчи Май райондук соту Майрам Акунованы күнөөлүү деп таап, аны 25 жылга эркинен ажыратуу өкүмүн чыгарган.