Күйөөсүн жиликтеген келиндин соту: Айыпталуучунун адвокаты күбөлөрдүн бири Киргшёлкто өз үйүндө мыкаачылык менен өлтүрүлгөнүн айтты

Бүгүн, 20-майда Бишкек шаарынын Октябрь райондук сотунда күйөөсүн жиликтеп, анын дене бөлүктөрүн шаардын ар кайсы райондоруна таштаган келиндин иши боюнча соттук отурум өттү. Анда айыпталуучунун жактоочусу бул иш боюнча күбө катары суракка чакырыла тургандардын бири өз үйүндө мыкаачылык менен өлтүрүлгөнүн билдирди.

Анын айтымында, Ысык-Ата районуна караштуу Киргшёлк айылындагы үйлөрдүн биринен 24-мартта мыкаачылык менен өлтүрүлгөн 3 аялдын бири Алина Глуховерова бул иш боюнча күбө катары суралмак. "Аны эми күбөлөрдүн катарынан алып салса болот", - деп кошумчалады жактоочу.

Эскерте кетсек, 2015-жылы 14-августта Бишкектин 5-кичи районунда таштанды челектеринин биринен эркек адамдын дене бөлүктөрү: кесилген колдору жана буттары табылган. Анын эртеси өлтүрүлгөн адамдын башы Фучик көчөсүнөн, чемоданга салынган денесинин дагы бир бөлүгү борбордогу чайканалардын биринин жанынан табылган. Тергөөнүн жүрүшүндө кылмышка шектүү катары маркумдун аялы кармалып, ал кылмышын моюнга алган. Кылмышка шектүү менен маркум Эрлан Оркошов 4 жыл бирге жашашкан, ортосунда 2 уулу бар.