"Кыргыз жерине келиңиз! Себеби бул өлкө жакында Швейцария, Италия же Жаңы Зеландияга айланат" дейт Орусиядан келген турист (фото)

Орусиядан кыргыз жерине келген турист Константин Бышевой Facebook социалдык тармагына кыргыз жеринде тартылган сүрөттөрүн жүктөп, кыргыз өлкөсү, эли, жери тууралуу жагымдуу пикирин калтырды.

"Кыргыз өлкөсү тууралуу кыскача... Эгерде сиз ал жакта болгон эмес болсоңуз, тез арада билет сатып алыңыз. Себеби бул өлкө жакында Швейцария, Италия же Жаңы Зеландияга айланат. Ал үчүн бардык шарттар бар. Чоң туристтик бизнес жана дүйнөлүк мейманканалар орун алат. Азырынча ал бойго жеткен кыз сыяктуу, өзүнчө бир башкача, жаңы, жадакалса уникалдуу. Кыргыз өлкөсү көркөм, кооз, мыкты өлкө. Сулуулукка толгон жана туристтин тынчын алган паспортко штамп бастыруу деген жок. Боорукер эл, орус тили, эң мыкты тамак жана күлкүлүү (азырынча) баалар.

Ысык-Көл - сөз жок, чыныгы кубаныч. Албетте, жагымсыз жактары да бар: анча жакшы эмес мейманканалар, начар жолдор, мындан он жыл мурда болушу керек болгон инфраструктура анча өнүккөн эмес. Мүмкүн, бул да болсо кыргыз өлкөсүнүн фишкасыдыр?

Кыргыз элинин мыкты жакка өзгөрүүгө ниети бар экендиги байкалат. Дагы бир аз убакыт өткөндө кыргыз өлкөсү туризмдин "Меккесине" айланат деп ишенем. Дагы бир ирет келип, лыжа тээп, балык уулап, тоого чыгып, дүйнөдөгү эң мыкты самсаны жейм деп да ишенем.

Кыргыз өлкөсү, мен сени сүйүп калдым! Чын айтып жатам. Ошондой эле чыныгы кыргыз жана мыкты жигит Санжар Урсеитовго рахмат, жакында кайтып келебиз.

Жакында "Живая планета" телеканалынан кыргыз өлкөсү жана бул сыйкырдуу өлкөдөгү жандуу символдор тууралуу чоң фильмди көрө аласыздар", - деп жазган.