ЖЫЛНААМА, 24-МАЙ: "Өздүк майрамды чоң шаан-шөкөткө айлантып, шарактап мас болуп белгилебейм" дейт куудул Борончу Кудайбергенов

Бүгүн, 24-майда куудул, тамада жана ырчы Борончу Кудайбергенов 50 жашка толду. Белгилүү куудулду өздүк майрамы менен куттуктап, байланышка чыктык:

"Эртең менен эрте туруп намаз окуп, көзү өтүп кеткен ата-энеме куран окудум. Бул дүйнөгө келишиме алар себепчи эмеспи. Бул күндү Кудайдын куттуу күнү катары эле кабыл алам. Өздүк майрамды чоң шаан-шөкөткө айлантып, шарактап мас болуп белгилебейм деле. Дос-туугандарым куттуктап жатышат. Азыр жоро-жолдошторум менен тынч эле белгилеп жатабыз. Куттуктаганыңыздар үчүн рахмат!"

Борончу Кудайбергенов 1966-жылы 24-майда Нарын облусуна караштуу Жумгал районунда туулган. 1984-1986-жылдары Чаектеги №26-кесиптик-техникалык орто окуу жайында окуган. 2003-жылы Жеке ишкерлерди өнүктүрүү институтуна тапшырып, 2008-жылы бүтүргөн. Борончу Кудайбергенов 2006-жылы белгилүү куудул Рахман Разыковдун демилгеси менен уюштурулган "Уланып күлкү баяны, сахнада куудулдар жана аялы" деген фестивалда баш байгени алып, Мерседес жеңил автоунаасын утуп алган. 2010-жылы Меккеге зыяратка барып, ажы болуп кайткан. 2011-жылы өлкө президенттигине талапкерлигин койгонго аракеттенген, бирок БШК Борончу Кудайбергеновдун талапкерлигин коюуга уруксат берген эмес.

24-майдын жылнаамасы.