Турдакун Ниязалиев концертинде Мирбек Атабеков менен "Айтыңыз маарек болсун" ырын дуэт аткарышты

Мирбек Атабеков ырчыга чыгармачылык ийгилик каалады. Андан соң Турдакун Ниязалиев "Айтыңыз маарек болсун" ырын Мирбек Атабеков менен бирге аткарды. Ошентип, ыйманга, үй-бүлөнү, ата-энени барктоого, эл-жерди сүйүүгө үндөгөн Турдакун Ниязалиевдин "Жубайыма" жеке концерти соңуна чыкты.

20:45. Учурда белгилүү ырчы Мирбек Атабеков "Таласым" чыгармасын ырдап жатат.

20:35. "Жубайыма" ыры бир үй-бүлөнү сактап калгандыгы тууралуу видео көрсөтүлдү. Анда ажырашууну чечишкен түгөйлөр кокусунан ушул ырды угуп калышып, ыйлап бири-биринен кечирим сурап, ажырашуу оюнан кайтканы баяндалды. Ырчы эч качан ажырашуу болбосун, ар бир үйдө ынтымак, сүйүү болсун деп "Жубайыма" чыгармасын комуздун коштоосунда аткарды.

20:30. Нарынбек Алыбаев "Кризис" ырын ырдагандан кийин Турдакун Ниязалиев "Келгиле, жаштар" чыгармасын тартуулады.

20:15. Ата-бала жөнүндө түрмөк көрсөтүлдү. Анда "ата, оюнчук машина алып бериңизчи, окууга акча бериңизчи, кийим-кечеге акча бериңизчи" деп чоңойгон бала атасынын "үйдүн чатырынан суу агып жатат, кичине акча болсо жакшы болмок" деген сөзүнө "акча жок" деп жооп берет. Андан кийинки да атасынын акча сурагандарына түрдүү шылтоолорду айтып, укмаксан болот. Ата-эненин "бир келип кетчи" деген сөзүнө баласы "Ии, дагы акча керекпи?" деп суроо салат. Анда атасы “апаңдын жаназасына кел” деп кайгылуу кабар угузат... Турмуштагы чыныгы окуяларды чагылдырган таасирдүү түрмөк көрүүчүлөрдү ойго салып, кээ бири көзүнө жаш алды.

Терең мааниге ээ видео көрсөтүлгөндөн кийин Гүлжигит Калыков “Ата-эне кадырын ким билет?” деген ырды ырдады.

20:05. "Каганат" комузчулар тобу белгилүү күүлөрдү аткарган соң кече ээси сахнага чыгып, ыйманга чакырган "Мухаммедим", "Ураан" чыгармаларын ырдады.

19:50. Концертте "Добулбас" тобу чыгармаларын аткарууда.

19:40. Ырчы "Канча ката кетирбейли, эне кечирет. Мен да энемди канча ирет капа кылдым билбейм, апамды капа кылсам, кечирим сурап, ушул 101 роза гүлүн сунамын" деп 101 роза гүлүн белекке берди. Апасын сахнага чыгарып, "Апакем" ырын аткарды.

19:35. “Эненин каты” монологунда терең маанилүү, таасирдүү сөздөр айтылып, бала төрөлгөндөн эр жеткенге чейинки учур эненин көз алдынан өтөт. Балага эненин мээрими, сүйүүсү канчалык бийик болору, ошол сүйүүнү убагында барктап алуу керек экендиги айтылат.

19:20. Нурмат Садыров “Айылым” ырын ырдаган соң энелерге арнап “Апакем” чыгармасын аткарды. Учурда "Эненин каты" аттуу сахналаштырылган көрүнүш баласына кат жолдогон эненин монологу көрсөтүлүүдө.

19:10. "Жубайыма” ырынан кийин Турдакун Ниязалиев “Каниет ыры” чыгармасын аткарды. Андан соң Маданият, маалымат жана туризм министрлиги тарабынан ырчы Ардак грамота менен сыйланды. Учурда ырчы Нурмат Садыров "Айылым" ырын ырдап жатат.

19:00. Үй-бүлө тууралуу сахналаштырылган көрүнүш чагылдырылып, сахнага Турдакун Ниязалиев чыкты. Учурда ырчы "Жубайыма" чыгармасын аткарууда.

18:50. Аалы Туткучев концертке келген ата-энелерге каалоо-тилек сөзүн айтты. "Карыларды сыйлайлы, эртең эле силер да карыйсыңар" деген төкмө акын да “Жубайыма” ырынын тарбиялык маанисине кеңири токтолуп, ырчыга чыгармачылык ийгиликтерди каалады. Андан соң үй-бүлөдөгү жубайлар ортосундагы сахналаштырылган көрүнүш көрсөтүлдү.

18:40. Концерт башталды. Концерттин башталышында сахнага төкмө акындар Жеңишбек Жумакадыр менен Аалы Туткучев чыгышты. Жеңишбек Жумакадыр "аялдын 40 түрлүү амалы бар, бир эле амалына чалынсаң, ыр жазбоого айлаң жок” деп сүйүү, аялзаты тууралуу ырдап, жеке концертин берип жаткан ырчыга ийгилик каалады. Учурда Аалы Туткучев ырдап жатат.

18:20. Бүгүн, 24-майда Бишкектеги Токтогул Сатылганов атындагы Кыргыз улуттук филармониясында "Жубайыма" ыры менен калың элге таанылган ырчы Турдакун Ниязалиевдин "Жубайыма" аттуу жеке концерти башталганы жатат. Ырчынын айтымында, концертте үй-бүлө, эл-жерди сүйүү, ата-энеге болгон урмат-сый тууралуу чыгармалар аткарылмакчы. Филармониянын залы көрүүчүлөргө толуп, алардын катарында улуу муун да, орто жаштагылар да, жаштар да көп. Концерт жогорку деңгээлде болору айтылып, көрүүчүлөр концерттин башталышын күтүп жатышат.