ЖЫЛНААМА, 25-МАЙ: 11 жыл мурун "Ливерпуль" футболдук клубу "Миланды" утуп, Чемпиондор Лигасын багындырган

2005-жылы 25-майда Түркиянын Стамбул шаарында УЕФАнын Чемпиондор Лигасынын финалдык беттеши орун алган. Анда англиялык “Ливерпуль” менен италиялык “Милан” кез келген.

Анда "Милан" футболдук клубу 1-мүнөттө эсепти ачып, Паоло Мальдини айырмаланган. 1-тайм аяктаганга чейин италиялыктар дагы 2 гол жаратышкан. Эрнан Креспо катары менен 2 гол киргизе алган. Эсеп 3:0, англиялыктар маанайы суз гана кийим которуучу жайга жөнөшкөн.

2-тайм өтө кызыктуу башталып, "Ливерпуль" арты-артынан чабуул уюштура баштаган. 54-мүнөттө команда капитаны Стивен Жеррард айырмаланып, командасына 1 гол алып келген. Кийинки 6 мүнөттө "Милан" атаандашына туруштук бере алган жок. 56-мүнөттө Шмицер дагы бир гол киргизсе, Хаби Алонсо 60-мүнөттө эсепти теңеген - 3:3.

Жыйынтыгында командалар пенальтилер сериясына чейин гол жарата алышкан эмес. Пенальтилер сериясында 3:2 эсеби катталып, "Ливерпуль" жеңишке жетишкен. Бул оюн аталган мелдештеги эң мыкты финал катары тарыхка кирген.

25-майдын жылнаамасы.