Бишкектин ички жолдорун жакшыртуу аракеттери уланууда

Бишкек мэриясынын алдындагы "Бишкек асфальт-сервис" ишканасы шаардын ички жолдорундагы жөө жүрүүчүлөргө арналган жолдорду сары түскө, жолдун ортолорун ак түскө боёп, айрым жолдорду оңдоону улантууда. Бул тууралуу бүгүн, 27-майда мэриянын басма сөз кызматы кабарлады.

Маалыматка ылайык, учурда Фрунзе көчөсүндө жол белгилери боёлууда. Алдыда шаардын башка көчөлөрүндө ушундай иштер аткарылат.

Ошондой эле ишкана жолдорду оңдоо менен алек. Учурда Исанов көчөсүнүн Киев көчөсүнөн жогорку бөлүгүндө тротуарды оңдоо, жолду калыпка келтирүү иштери аткарылууда.

2016-жылы жалпысынан шаардын 44 ички жолу оңдоп-түзөөдөн өтөт.