Атай Өмүрзаков: "Улуу Британиянын жана башка өлкөлөрдөгү жарандардын колдоосу биз үчүн кымбатка турат, бул жеңишке барабар"

25-майда бийчи Атай Өмүрзаков жана "Тумар КР" бий тобу Лондондо "Britain's Got Talent-2016" бий сынагынын жарым финалында өнөр көрсөтүшкөн. Кыргыз бийчилеринин өнөрүн көргөн калыстар, залдагы көрүүчүлөр ордуларынан туруп кол чабышкан. Бирок ага карабай бийчилер финалга өтө алышкан эмес. Бул тууралуу бийчи социалдык тармактагы жеке баракчасына жазып чыкты.

"Бизге күч жана мотивация берген зор колдооңуздар үчүн баарыңыздарга терең ыраазычылык билдиребиз. Биз түрдүү долбоорлорго, сынактарга катышып келебиз, бирок бул ирет алгачкы жолу баарыңыздардын колдооңуздарды сездик. Сынакка катышууга колдоо көрсөткөн өлкө башчы Алмазбек Шаршеновичке өзүнчө ыраазычылык. Бул биз үчүн абдан маанилүү, анткени бул нерсе биз менен кыргыз эли, кыргыз өлкөсү бирге экенин билдирет. Канчалаган кыйынчылыктарга карабай максатка жетүү үчүн аракет кылабыз. Мамлекеттин колдоосу биздин жолдогу кыйынчылыктарды жеңилдетет. Бул нерсе менен эле чектелип калбайбыз, дагы да болсо аракетибизди уланта беребиз. Колубуздан келишинче таланттуу балдарды колдоого жана эл аралык сынактарга катышууга жардам берүүгө аракет кылабыз.

Жеңилип калганыбыз үчүн актанууну каалабайбыз, бирок баары талкууга алып, Улуу Британиянын жарандары жана башка өлкөлөрдөгү интернет колдонуучулардын бизди колдоп, жыйынтыкка нааразы болгону биз үчүн кымбатка турат, бул биз үчүн жеңишке барабар. Баарыңыздарга рахмат: улуу кыргыз элине, мамлекетибизге, өлкө башчыга, бизди колдогон башка өлкөнүн жарандарына, ошондой эле Улуу Британия, Ирландия өлкөсүнүн жарандарына!" - деп билдирген Атай Өмүрзаков.