Орусиялык гүлдөр чебери Араика Галстян Бишкекте үлпөт той гүлдөрү менен шоу өткөрдү (фоторепортаж)

28-майда борбор калаадагы эс алуучу жайлардын биринде үлпөт той гүлдөрү менен шоу өткөрүлдү. Анда үлпөт той өткөрүлчү залдын ичин жасалгалоо боюнча мастер-класстар көрсөтүлүп, моделдер этностилдеги жана үлпөт көйнөктөрдү кийишип, подиумга заманбап, жаңы стилдеги гүлдестелер менен чыгышты. Ошондой эле бул кечеде атайын чакырылган коноктор арасында белгилүү алып баруучу Ассоль Молдокматова, ырчылар Кайрат Примбердиев, Юлия Руцкая болду.

Маданий иш-чаранын уюштуруучусу Лили Хан буларга токтолду:

"Үлпөт той гүлдөрү менен шоу быйыл үчүнчү ирет өткөрүлүп жатат. Бул ирет орусиялык гүлдөр чебери Араика Галстян менен флористика боюнча өлкө чемпиондугу өткөрүлүп, ошондой эле ал
мастер-класс көрсөттү. Анда Галстян үлпөт той өткөрүлчү жайды заманбап стилде гүлдөр менен кантип жасалгалоо керектигин түшүндүрүп, көрсөтүп берди.

Бул долбоордун максаты - дүйнөгө биздин улуттук маданиятты таанытуу, көрсөтүү, элдин флористика боюнча маданиятын көтөрүү. Гүлдөр жашоодо эмне үчүн керек, аларга туура кам көрүү, колдонуу, кантип сүйүү керектиги тууралуу да айтылды".