Бүгүндөн баштап жаңы унаа номерлери бериле баштады (фото)

Бүгүн, 1-июнда Мамлекеттик каттоо кызматынын алдындагы унаа номерлерин жасаган "Инфоком" мамлекеттик ишканасы ачылды. Бул тууралуу аталган кызматтын басма сөз кызматы билдирди.

Тайырбек Сарпашев мамлекет унаалар үчүн алгачкы жолу өзү унаа номерлерин жасап баштаганын айтты.

"Буга чейин номерлерди жасоодо айрым адамдар киреше таап жатканы тууралуу бир эле жолу айтылган эмес. Ачыгын айтсам, бул долбоордун ишке ашышына кээ бир саясатчылар каршы болуп, тоскоолдук кылып жатышты. Бул номерлердин өзгөчөлүгү - камералар аныктай ала турган номердик белгидеги атайын шрифт", - деди Сарпашев.

Мамлекеттик каттоо кызматы номердин бир комплекти 950 сомго барабар экенин билдирди. Мурунку баасы 1215 сом болчу. Жаңы номерлерди жарандар өз эрки менен алышат. Андан тышкары жаңы номерлер жаран жаңы унаа алганда же жаңылап каттоодон өткөргөндө берилмекчи. Ал эми сандары өзгөчө комбинациядагы номерлер мурдагыдай эле аукциондо сатылат. Мындай аукциондун биринчиси июнь айынын үчүнчү декадасына белгиленди.

Ар бир аймактын өзгөчөлүгү кайсы бир тамгалар менен белгиленбестен, коддор менен аныкталган:

Бишкек шаары - 01

Ош шаары - 02

Баткен облусу - 03

Жалал-Абад облусу - 04

Нарын облусу - 05

Ош облусу - 06

Талас облусу - 07

Чүй облусу - 08

Ысык-Көл облусу - 09

Ал эми "KG" белгиси бардык транспорт каражаттарына басылган.