Бишкектеги эмен дарактарына курт түштү, "Жашылдандыруу" ишканасы курт менен күрөшүүгө кеч болуп калганын айтты

Жаз мезгили эми гана аяктап жатканына карабай Бишкек шаарынын Ибраимов көчөсүндөгү эмен дарактарынын жалбырактары саргарып калды. Бул курт түшкөнү менен байланыштуу. Бак-дарактарга зыян келтирген курт-кумурскалар менен күрөшүү иш-аракеттери 2013-жылы гана болгонун SUPER.KG порталына "Жашылдандыруу" муниципалдык ишканасынын агроному Сергей Кравер билдирди.

"Булар жалаң гана эмендин жалбырагын жей турган курттар. Зыянкечтерге каршы иш-чараны 2013-жылы өткөргөнбүз. Андан бери зыянкечтер жоголуп кеткенине байланыштуу Улуттук илимдер академиясына караштуу Токой чарба институту аталган иш-аракетти токтоткон. Эми зыянкечтер кайрадан пайда болушту. Биз азыр дарактарга эч кандай жардам бере албайбыз, анткени зыянкечтерге каршы иш-чараны жаз мезгилинде гана өткөрүү керек", - деди агроном.

Адистин айтымында, курттар эмендин жалбырагына жана анын өсүүсүнө зыянын тийгизет.