СУПЕРСТАН: "Жол чырактан жөө өтүп бараткан адамдар "чоюлганда" жаным кашайып кетет"

SUPER.KG порталынын "Суперстан" бөлүмүндө "Жол чыракты карап өтөсүңөрбү?" деген тема талкууга алынды.

Темадагы билдирүүлөрдөн:

"Москвада жол чыракты сөзсүз карап өтөсүң. Былтыр Өзгөнгө барсам унаасы деле, жөө адамы деле карабайт экен. Эсим ооп жашыл күйсүн деп турам, жашыл жарык күйсө да айдоочулар токтошпойт. "Сен токтобосоң, мага деле баары бир" деп карабай өтүп кеткем".

"Унаа айдап баратканда сөзсүз карайм, кызылдан эч качан өткөн эмесмин. Байкабай өтүп кеткен күндөр болгон, бирок түнкүсүн жана чоң жолдордон эмес. Ал эми жөө бараткан адамдардын чоюлуп өткөндөрү жанды кашайтат. Алар кызылдан өтүп баратышса ичимден сөгөм, бирок өзүм жөө болсом, кээде кызыл жарыктан деле өтүп кетем, бирок чоюлбай, кылдаттык менен".

"Студент кезде, 1-2-курста окуп жүргөндө шашылып баратканда кызылга токтобой эле айдап кеткен учурлар болгон, себеби жол-кайгуул кызматкерлери менен жакшы тааныш элем.
Азыр токтолуп калганымдын белгисиби, айтор, жол чыракка карап, ал тургай ылдамдыкты да азайтып айдап калгам".

"Жол чыракты унаа менен жүргөндө карайм. Жөө жүргөндө карабай эле өтөм".

"Дайыма карап өтөм, кээде шашылганда өтүп кетким келет, айла жок... Биздин окуу жайдын алдында төрт көчө бар. Бир агайыбыз "жол чыракты карап, өлбөй өтсөңөр эле окубасаңар да окууңарды бүтүп кетесиңер" деп көп айтат. Анан ошого өлбөй бүтүп кетейин деп жол чыракты карап жүрөм".

"Кээ бир адамдар кызыл жарык күйүп турса деле кете беришет, таң калам. Ал жол чырак сенин өмүрүң үчүн коюлган. Көчөдөн сөзсүз жол эрежеси менен жүрөм. Биздин жаныбыздагы жол чоң, эки тараптуу. "Зебрадан" өткөндөн да корком, кээде баскым келсе атайын жолду узартып, жол чырак тарап менен көчө кыдырып келем".

Талкууга кошулгуңуз келсе, бул жакка кириңиз.