Мектеп бүтүрүүчүлөрү чогулткан стипендияларын кайрымдуулукка жумшашты (фото)

Бүгүн, 4-июнда Бишкек шаарынын мектептеринин биринин бүтүрүүчүлөрү Кароосуз калган балдардын реабилитациялоо борборуна тамак-аш, ашканага керектүү буюмдарды тапшырышты.

"Биз бул балдар үйүнө жардам керек экенин интернеттеги социалдык тармактан окуп, 50 окуучу стипендияларыбызды чогултуп, өздөрү айткан керектүү буюм, азык-түлүктөрдү алып келип бердик. Бул биздин биринчи жолу жасап жаткан кайрымдуулук иш-чарабыз", - дейт уюштуруучулардын бири Марат Ниязов.

Мектеп бүтүрүүчүлөрүнүн кайрымдуулук иш-чарасын ырчылар Анжелика, Куба Айтбосунов, кытайлык кыргыз ырчысы Макелек кызы Гүлмира жана телеалпаруучу Айзада Жамгырчиева колдоп келишти.

Мындан сырткары "Датка" бий тобунун кыздары өнөрлөрүн тартуулап, иш-чаранын соңунда аларга кошулган балдар "Кара жорго" ырына бийлешти.