Мухаммед Алинин табытын көрүстөнгө чейин көтөрчүлөрдүн катарында Леннокс Льюис менен Уилл Смит да бар

Легендарлуу мушкер Мухаммед Алинин сөөгү 10-июнда, жума күнү жерге берилет. Анын табытын көтөрө турган 8 адамдын катарына атактуу британиялык мушкер Леннокс Льюис менен америкалык актёр Уилл Смит кирди. Бул тууралуу чет элдик маалымат булактары кабарлайт.

Маалыматка ылайык, 10-июнда мушкерди акыркы сапарга узатуу зыйнаты каралган. Ага каалоочулардын баары келе аларын белгилешет чет элдик басылмалар.

Уилл Смит 2001-жылы жарык көргөн "Али" деген тасмада Мухаммед Алинин образын жараткан. Бул ролдон кийин мушкер менен актёр жакшы мамиледе болуп келишкен. Ал эми британиялык мушкер Леннокс Льюис бокс тарыхында өз чыйырын салган мушкер. Льюис Майк Тайсон, Эвандер Холифилд, Виталий Кличко сыяктуу атактуу мушкерлерди жер каратып, рингде жеңишке жетишкен жайы бар.

Кошумчалай кетсек, М.Али 3-июнда Финикс шаарындагы ооруканалардын биринде 74 жаш курагында көз жумган.