Алмазбек Атамбаев менен Дмитрий Медведев жаратылыш паркында болушту

Кечээ, 6-июнда президент Алмазбек Атамбаев менен Орусиянын өкмөт башчысы Дмитрий Медведев "Ала-Арча" жаратылыш паркын аралап сүрөткө түшүшкөнүн бүгүн президенттин жеке сүрөтчүсү Султан Досалиев Facebook социалдык түйүнүндөгү жеке баракчасына жайгаштырды. Буга чейин Дмитрий Медведев Инстаграмдагы жеке баракчасына "Тянь-Шандын тоо этектеринде" деген аталыштагы сүрөттү жарыялап, анын баракчасына жазылган 2,2 миллион окурмандын 51,5 миңи "жакты" деген белгини басышты.

Белгилей кетсек, Медведев бир канча убакыттан бери фотоаппарат менен тартып жүргөн сүрөттөрүн Таиланддын борбору Бангкок шаарында көргөзмөгө койгон. Арасында кыргыз өлкөсүндөгү Дүйнөлүк көчмөндөр оюндарына даярдык көрүп, жалындап күйүп ат чаап бара жаткан чабандестин жана Семёнов капчыгайында жергиликтүү элдин жылкы айдап бара жатканы тартылган сүрөттөрү да бар эле.