ЖЫЛНААМА, 9-ИЮНЬ: Ырчы Турдакун Ниязалиев: "Дин жолунда жүргөндүктөн, туулган күн майрамын белгилебейм"

Мындан 31 жыл мурун, 1985-жылы 9-июнда ырчы Турдакун Ниязалиев туулган. Өздүк майрамын кантип тосууну пландап жатканын билүү үчүн ырчы менен байланыштык.

"Мен эми туулган күнгө деле маани бербейм. Дин жолунда жүргөндүктөн, бул күндү майрам катары эмес, жылдын жыйынтыгын чыгарчу күн катары кабыл алам. "Бир жыл өттү, кандай ийгиликтер жана кемчиликтер болду?" деген эле ой-толгоолор менен өтүп кетет. Туулган күндү белгилебейм", - дейт ырчы.

Турдакун Ниязалиев Талас облусунун Бакай-Ата районундагы Көк-Таш айылында туулган. Бала кезинен эле мектепте баян ойноп, ырдап жүрүп, кийин обон жазып калган. 10-класста окуп жүргөндө Ынак Осмоналиев ырдап жүргөн "Айлуу кеч" деген ырын жазган. Махмуд Кашгари-Барскани атындагы Чыгыш университетинин араб тили факультетине тапшырган. Араб тили аркылуу ислам дүйнөсүнө аралашып, шариятта ырдоого тыюу салынгандыктан, чыгармачылыкты таштап салган. "Эгер ыр адамды адеп-ахлакка, Ата Мекенди сүйүүгө чакырса, ырдаса болот" дегенди уккандан кийин кайра чыгармачылыкка киришкен. Атайын музыкалык билими жок. Чыгармачылык ырчы үчүн кесип эмес, жөн гана хобби.

9-июндун жылнаамасы.