ЖЫЛНААМА, 10-ИЮНЬ: Мындан 6 жыл мурун Ош шаарында жаштар тобунун арасында жаңжал чыгып, кандуу Июнь окуясы башталган

Мындан 6 жыл мурун, 2010-жылы 10-июнда саат 22:00 чамасында Ош шаарынын “Алай” мейманканасынын жанында жаштар тобунун арасында жаңжал чыккан. Ошол замат агрессивдүү маанайдагы жаштар топтоло баштаган. Алардын колунда арматура, жыгач таяк жана курал болгон. Жаштардын тобу эки улуттун тирешүүсү үчүн туш келген адамдарды, мейли өзбекпи, мейли кыргызбы, атып, мекемелердин имаратына жана үйлөргө өрт койгон. Милиция кызматкерлеринин жана окуяга күбө болгон адамдардын айтымында, топту тишине чейин куралданган 5-6 адам жетектеген. Алардын артында 30-50дөй арматура жана жыгач таяк көтөргөндөр жүрүшкөн. Ошондой эле бул топтун ичинде снайперлер да болгон.

Бир эле учурда эл арасында “өзбектер атып жатышат, кыргыздар өлтүрүп жатышат” деп таратылган жалган маалыматтар эки улуттун ортосундагы жаңжалдын уланышына себепкер болуп калган. 11-июнда саат 02:00дө Убактылуу өкмөт өзгөчө кырдаал жарыялап, коменданттык саат киргизген. Ошол эле күнү саат 04:00дө шаардагы "Фрунзе" базарына жакын жерде өрт, мародёрлук башталган. Өзбек улутундагылар көп жашаган айылдардагы жашоочулар борбордук көчөнү бууп алышкан.
Бул жаңжал жүздөгөн кишинин өмүрүн алып кеткен улуттар аралык кагылышка алып келген.

10-июндун жылнаамасы.