Палеонтолог: "Ысык-Көлдөн табылган байыркы жаныбардын сөөгү лаборатория даяр болбой изилдене элек"

Үстүбүздөгү жылдын 10-мартында Ысык-Көл облусундагы Ак-Суу районунун Орлиное айылында байыркы жаныбардын сөөгү табылган. Улуттук илимдер академиясынын Геология институтунун палеонтологу Айзек Бакиров байыркы жаныбардын сөөгү учурда убактылуу сактоочу жайда сакталып турганын бүгүн, 10-июнда SUPER.KG порталына кабарлады.

"Учурда лабораторияларыбызда оңдоп-түзөө иштери жүрүүдө. Андыктан жаныбардын сөөгүн алып чыгуу кооптуу, себеби анын сөөгүн Ысык-Көлдөн азап менен чогултканбыз, майдаланып, бычырап калышы мүмкүн. Аны изилдөө үчүн сөөгүн кылдаттык менен кураштырып, чаптап чыгуу зарыл. Сөөктү атайын техник-препаратор чогултушу керек. Ал адис кыргыз жергесинде жок болгондуктан, өзүбүз чогултууга туура келет. Кээде сөөктүн кичине жери 1-2 суткада чогултулушу мүмкүн. Ал жаныбарды изилдөө бизге чоң кызыгуу жаратууда. Тилекке каршы, азырынча шарттар болбой жаткандыгына байланыштуу изилдөө иштери токтоп турат", - деди Бакиров.

Палеонтолог берген маалыматка караганда, сөөктөр учурда консервацияланган бойдон, герметикалык идиштерде сакталуу. Мындан тышкары байыркы жаныбардын сөөгү күтүүсүздөн табылгандыктан, аны изилдөө жакынкы арадагы пландык иштерге кире элек экенин кошумчалады палеонтолог.