Бишкектин борбордук бөлүгүндөгү эски үйлөрдү сүрдүрүүгө жол ачуучу мыйзам даярдалды

Бишкек шаарынын борбордук бөлүгүндөгү эски курулуштар бузулушу мүмкүн. Карпинский, Линейная, Жибек-Жолу көчөлөрү жана Жаш Гвардия бульвары менен чектелген аймакта 1996-жылга чейин курулган курулуштарды алып коюу тууралуу мыйзам долбоору даярдалып, коомдук талкууга коюлду. Мыйзам долбоорунун демилгечилери - “Ата Мекен” фракциясынын депутаттары Өмүрбек Текебаев, Аида Салянова, Садык Шер-Нияз жана башкалар. Документтин максаты – Кыргыз Республикасынын борбор шаарын заманбап көрүнүшкө келтирүү. Жаңы заманбап имараттарды куруу үчүн эскилиги жеткен үйлөрдү (менчигинин түрүнө карабай) жана имараттарды мэриянын балансына алып коюп, сүрдүрүү жолдору сунушталууда.

Долбоорго ылайык, менчик ээсине мүлктүн баасындагы компенсация төлөнөт. Бузула турган мүлктүн базар баасын мэриянын комиссиясы жана көз карандысыз компаниялар, баалоочулар аныктайт. Мыйзам долбоору жакын арада парламентте каралмакчы.