Батирди мейманкана катары иштетүүгө тыюу салуу демилгеси парламенттик комитетте чоң талкуу жаратты

Жогорку Кеңештин Экономикалык жана фискалдык саясат боюнча комитетинин 14-июндагы жыйынында батирлерди мейманкана катары иштетүүгө тыюу салуу, саатына берилүүчү батирлерди көзөмөлдөө жана айып пул салуу укугун ички иштер органдарына берүү боюнча мыйзам долбоору 2-окууда каралууда.

Анын жүрүшүндө демилгечи Кожобек Рыспаев саатына берилүүчү мейманканалардын турак батирлер менен кошуна болушу жаш муундарга абдан тескери таасирин тийгизүүдө. "Тартиптүү адамдар өз үйлөрүндө тынч уйкудан жана эс алуудан ажырап, мейманканаларга келген адамдардын уятсыз аракеттерин, башка жосунсуз жоруктарын күн сайын угууга жана көрүүгө мажбур болушууда, ошондой эле алардын мас абалындагы мушташтарын жана чыр-чатактарын көрүп жатышат. Саатына берилүүчү мейманканалардын болушу коомдук жана мамлекеттик коопсуздукка коркунуч келтирет, анткени аларда сот адилеттигинен качып жүргөн криминалдык элементтер, өздөрүнүн кылмыштуу иш-аракеттерин пландаган террордук топтор жеңил-желпи жайгаша алышат", - деди Рыспаев.

"Жеке менчик мейманканаларга көзөмөлдү күчөтүү максатында бул маселени кароону жергиликтүү өз алдынча башкаруу органдарынан алып салуу жана ушул маселени кароону жана административдик айып пул салууну ички иштер органдарына берүү мыйзам долбоорунда сунуш кылынып жатат", - деп толуктады демилгечи депутат.

Депутат Айсулуу Мамашеванын айтымында, бул мыйзам долбоорунда мейманканаларды көзөмөлдөө механизмдери жана кимге айып пул салынары белгиленген эмес. "Укук коргоо органдары эң коррупцияланган болуп эсептелинет. Ошондуктан батирлерди ижарага алгандардан милиция кызматкерлери пара албайт деп эч ким кепилдик бере албайт. Мындан тышкары мыйзам долбоору жарандардын жеке турак жайына кирүүгө жол берет экен", - деп Мамашева мыйзам долбоорун кайра иштеп чыгууга чакырды.

Комитеттин төрагасы Нурлан Макеев демилгечи Рыспаевге бир жума ичинде мыйзам долбоорунун үстүнөн иштеп, депутаттардын сунуштарын эске алып, 2-окуунун режиминде көрсөтүүнү сунуштады. К.Рыспаев бул сунушка макул болду.