Кыргыз Республикасынын Түркмөнстандагы Маданият күндөрүнүн салтанаттуу ачылышы болду

14-июнь күнү Кыргыз Республикасынын Түркмөнстандагы Маданият күндөрүнүн салтанаттуу ачылышы болду. Бул тууралуу бүгүн, 15-июнда Маданият, маалымат жана туризм министрлигинен билдиришти.

"Зал толо көрүүчүлөр келген өнөрпоздордун концерти Түркмөнстандын маданият министри Аннагелди Гараджаев жана министрликтин статс-катчысы Бактыбек Секимовдун куттуктоо сөзү менен башталды", - деп айтылат маалыматта.

Маалыматка ылайык, концертке Түркмөнстандагы бардык элчилер жана жергиликтүү жашоочулар күбө болуп, кызуу колдошту. Концерттин соңунда Кыргыз Республикасынын Эл артисти Кыргызбай Осмоновдун аткаруусунда кыргыз-түркмөн достугун даңазалап жазылган жаңы чыгарма жаңырды. Эл достугуна арналган бул ырдын сөзүн акын Бактыгүл Чотурова, ал эми обонун Сардарбек Жумалиев жазган.