3374 адамга мунапыс жарыялоо демилгеси көтөрүлдү

Жогорку Кеңеште "1916-жылдагы улуттук боштондук көтөрүлүшүнүн 100 жылдыгына жана Кыргыз Республикасынын эгемендүүлүгүнүн 25 жылдыгына байланыштуу мунапыс тууралуу" мыйзам долбоорунун концепциясы каралды.

Алдын ала маалыматтарга караганда, бул мыйзам кабыл алынып калса, 3374 адамга мунапыс жарыяланат. Анын ичинде эрезеге жете элек 11 бала болсо, ден соолугунун мүмкүнчүлүгү чектелген 10 адам бар. 1267 адам - анчалык оор эмес кылмыш жасагандыгы үчүн соттолгондор, 1862 адам - биринчи жолу анчалык оор эмес кылмыш жасагандар. Ал эми оор жана өзгөчө оор кылмыш жасаган адамдарга карата мунапыс колдонулбайт.

Талкуу жүрүшүндө мыйзам долбоорунун ченемдерин дагы бир ирет кылдат карап чыгып, экинчи окуунун жүрүшүндө тиешелүү оңдоолорду киргизүү зарылдыгы белгиленди.

Жыйынтыгында депутаттардын сунуштары эске алынуу менен мыйзам долбоорунун концепциясы добуш берүүгө жөнөтүлдү.

Белгилей кетсек, 25 жыл аралыгында 19 мунапыс кабыл алынган.