Сооронбай Жээнбеков Чүй дайрасы коркунуч жараткан Бишкек-Нарын-Торугарт жол тилкесине барды

Кыргыз Республикасынын Премьер-министри Сооронбай Жээнбеков 15-июнда Чүй облусуна болгон иш сапарынын алкагында Чүй дайрасынын ташкындоосуна байланыштуу жолдун суу астында калуу коркунучу жаралган Бишкек-Нарын-Торугарт жол тилкесине барды.

Кыргыз Республикасынын Өзгөчө кырдаалдар министринин орун басары Нурбек Сыдыгалиевдин маалыматына ылайык, Чүй дайрасындагы суунун деңгээли нөшөрлөгөн жаандын жана андан кийинки ысык аба ырайынан улам мөңгүлөрдүн эрүүсүнүн натыйжасында үстүбүздөгү жылдын 9-июнунан 10-июнга караган күнү көтөрүлгөн. Анын айтымында, бүгүнкү күндө суунун деңгээлинин жогорулашы сезондук көрүнүш жана суу каптоо коркунучу жок.

Сооронбай Жээнбеков өкмөттүн Чүй облусундагы ыйгарым укуктуу өкүлү Бактыбек Кудайбергеновго жана Өзгөчө кырдаалдар министрлиги менен Транспорт жана коммуникациялар министрлиги менен биргеликте кооптуу аймактардагы жээктерди бекемдөөнү күчөтүү тапшырмасын берди.