"Тазалык" жана "Жашылдандыруу" ишканалары нөшөрлөп жааган жамгырдан кийин шаар көчөлөрүн жана ирригациялык тутумдарды тазалоодо

Бишкек шаардык мэриясы нөшөрлөп жааган жаандан кийин борбор калааны көрктөндүрүү иштерин улантууда. Бул тууралуу Бишкек шаардык мэриясынын басма сөз кызматы бүгүн, 16-июнда билдирди.

"Тазалык" жана "Жашылдандыруу" ишканаларынын жумушчулары нөшөрлөп жааган жаандан кийин шаар көчөлөрүн жана ирригациялык тутумдарды тазалап жатышат. Өткөн түнү Бөкөнбаев жана Лев Толстой көчөлөрүнүн кесилишиндеги көпүрөнүн астына суу толуп, аны ирригациялык түйүндөрдөгү таштандыны тазалап агызышкан", - дешти мэриядан.

Ошондой эле кечээ социалдык тармактардагы "Аалы Токомбаев көчөсүндөгү суу менен жуулуп кеткен жол үстүндөгү белгилердин" сүрөттөрү тууралуу билдирүү таратты:

"Жол үстүндөгү белгилер "Бишкек асфальт-сервис" муниципалдык ишканасы тарабынан үстүбүздөгү жылдын май айында муздак пластиктен түшүрүлгөн. Ал жаандын суусу менен жуулуп кетпейт. Кечээ кечинде унаа жүрүүчү жол бөлүгү сууга толуп калган. Унаалар жогорку ылдамдыкта жүрүшкөндүктөн, сууда көбүк пайда болгон. Көбүктү боёкко окшоштурушкан".

Жол үстүндөгү белгилер инновациялык материал болгон пластиктен түшүрүлгөн жана алар көпкө чейин жешилбейт.