"Альфа Телеком" жабык акционердик коомунун акцияларын сатып алуучулардын жоктугунан аукцион өтпөй калды

"Альфа Телеком" жабык акционердик коомунун акцияларын сатуу аукционуна каттоо 15-июнда аяктап, 16-июнда аукцион өткөрүлмөк.
Кыргыз Республикасынын Өкмөтүнө караштуу Мамлекеттик мүлктү башкаруу боюнча фондунун расмий сайтында жарыяланган маалымат боюнча, "Мегаком" соода маркасынын алдында көрсөтүп келген "Альфа Телеком" жабык акционердик коомунун 100 пайыз акцияларынын сатылуусу аукционго катышууга каалоочулар болбогондугуна байланыштуу өткөрүлбөй калды.
"Аукционго экиден көп сатып алуучу катышса гана аукцион өттү деп эсептелинет. Бирок 15-июнда саат 10:00дө катышууга эч кимден өтүнмө келген эмес", - деп айтылат маалыматта.

Фонддун берген маалыматына таянсак, "Альфа Телекомдун" 7800 сатуу пункту, облустар боюнча 7 регионалдык бөлүмү, 31 фирмалык салону бар. 2015-жылдын 30-июнундагы көрсөткүчү боюнча, анда 1263 адам эмгектенип, абоненттик базасы 2 миллион 829 миң адамды түзөт.