Ош облусунун Кара-Суу районунда жер титирөөдөн жабыр тарткандарга 33 миллион сом бөлүндү

Ош облусунун Кара-Суу районунда жер титирөөдөн жабыр тарткандарга 33 миллион сом бөлүндү. Бул тууралуу бүгүн, 20-июнда өкмөттүн Ош облусундагы ыйгарым укуктуу өкүлүнүн басма сөз кызматынан билдиришти.

Маалыматка ылайык, 2015-жылдын 17-ноябрында болгон жер титирөөдөн улам жабыр тарткандарга жардам катарында Кара-Суу районуна 33 миллион 609 миң сом бөлүнгөн. Жаратылыш кырсыгынан
4-5-даражада зыянга учураган турак үйлөрдүн саны 288ге жеткен. Акча каражатын атайын түзүлгөн айылдык аймактардын комиссиялары бөлүштүрмөкчү.

"Бул өтө жооптуу иш. Жабыр тарткан жарандардын, мамлекеттен, коомдук уюмдардан жана башкалардан келген каражаттарынан жардам алышкандыгын карап чыгып, баарына бирдей бөлүнөт. Бардык жагдай эске алынып, майып, жетим-жесир, турмуш шарты оор адамдарды акыйкаттык менен такташат", - деп билдирди басма сөз кызматы.

Эскерте кетсек, 2015-жылдын 17-ноябрь күнү түнкү саат 23:30 чамасында күчү 7 баллга жеткен жер титирөө катталган.