Өлкөдө көз карандысыз тергөө комитетин түзүү сунушталды

Өлкөдө тергөө комитети түзүлүшү мүмкүн. Тиешелүү сунушту бүгүн, 20-июнда Жогорку Кеңештин жарандарды кылмыш жоопкерчилигине мыйзамсыз тартууларды иликтөө боюнча убактылуу депутаттык комиссиясынын жыйынтыктоочу отурумунда депутат Кенжебек Бокоев билдирди.

Анын айтымында, укук коргоо органдарынын бардык тергөө бөлүмдөрүн бириктирип бир тергөө комитетин түзүү керек. "Облустук бөлүмдөр райондук бөлүмдөргө баш болуп иштетишпейт. Облустук бөлүмдөрдү жоюш керек. Райондук бөлүмдөр болсо башкы орган менен түздөн-түз иштеши зарыл. Эгер бөлүмдөрдү бириктирсек жетекчилердин саны азаят, бюрократия жоюлат", - деди депутат.

Айта кетсек, 2015-жылы козголгон 75 кылмыш иши боюнча жоопкерчиликке тартылган 111 адам акталган. 2014-жылы 106 кылмыш иши боюнча кармалган 173 адам акталган.