18 жашка чейинки улан-кыздарды кызматтык сапарларга жибербөө жана мөөнөтүнөн ашык иштетпөө сунушталууда

Эмгек мыйзамдарын өркүндөтүүнү караган Кыргыз Республикасынын Эмгек кодексине өзгөртүүлөрдү сунуштаган мыйзам долбоору Жогорку Кеңештин Социалдык маселелер, билим берүү, илим, маданият жана саламаттык сактоо боюнча комитетинин 20-июндагы отурумунда экинчи окууда каралып, жактырылды.

Депутат Максат Сабиров тарабынан демилгеленип жаткан аталган мыйзам долбоору 18 жашка чейинки улан-кыздарды кызматтык сапарларга жиберүүгө, мөөнөтүнөн ашык иштөөгө, түнкү убакта, дем алыш жана майрам күндөрүндө жумушка, маданий-массалык иш-чараларга тартууга тыюу салат.

Кесипкөй спортчуларды кошпогондо өкмөт тарабынан белгиленген кесиптердин тизмегине ылайык, жалпыга маалымдоо каражаттарынын, кинематография, театрдык жана концерттик уюмдардын, цирктердин чыгармачыл кызматкерлерин жана ата-энелеринин биринин (камкорчусунун) жазуу жүзүндөгү макулдугу жана ыйгарым укуктуу мамлекеттик органдын уруксаты болгондо чыгармаларды жаратууга жана аткарууга уруксат берилет.