ӨКМ: Жалал-Абад облусунда чагылгандан 120 эмес, 145 кой өлгөн

Жалал-Абад облусунун Аксы районунда чагылгандан 145 кой өлгөнүн Өзгөчө кырдаалдар министрлигинин маалымат кызматы кабарлады. Аталган райондогу Ак-Жол айыл аймагынын башчысынын орун басары Келдейбай Сатыбеков 20-июнда SUPER.KG'ге өлгөн койлордун саны 120 экенин билдирген эле.

ӨКМнын Аксы райондук бөлүмүнүн башчысы Замирбек Дүйшөбаевдин берген маалыматына ылайык, 16-июнь күнү саат 09:00-10:00 чамасында Аксы районунун Ак-Жол айыл аймагына караштуу Ак-Суу айылынын тургундары Анарбек уулу Жахангир жана Умар Жолдошбаев 600 койду Токтогул районунун Кашка-Суу жайлоосуна айдап баратышкан. Алар Суук-Дөбө жайлоосуна жетишкенде ташка чагылган түшүп, 145 баш кой зоодон ыргып кеткен. Анын ичинен 115 койду союп, кардын жарып алышкан, калган 30 кой белгисиз болууда. Союлган койлорду 17-июнда ээлерине ошол жерден таркатып берип, калган койлорду андан ары айдап кетишкен. Бир дагы мамлекеттик органга маалымат беришкен эмес.