Замирбек Айдаров транспорт жана жол министринин милдетин аткарат

Замирбек Айдаров транспорт жана коммуникациялар министри кызматынан бошотулуп, аталган министрликтин башчысынын милдетин аткарууга киришти. Тиешелүү жарлыкка президент Алмазбек Атамбаев кол койгонун бүгүн, 23-июнда президенттик аппараттын басма сөз кызматы жарыялады.

"Президенттин жарлыгына ылайык, Кыргыз Республикасынын Премьер-министринин сунушу кабыл алынып, Кыргыз Республикасынын Жогорку Кеңешинин тиешелүү жактыруусу алынганга чейин Замирбек Айдаровго Кыргыз Республикасынын Транспорт жана жол министринин милдеттерин аткаруу жүктөлдү", - деп айтылат маалыматта.

Айта кетсек, 2016-жылдын 13-апрелинде Жогорку Кеңеш өкмөттүн жаңы курамын бекитип, транспорт жана жол министри кызматына Замирбек Айдаровдун талапкерлигин жактырган.