Шаардын борборундагы мамлекеттик цирктин алдында сарымсак, капуста өстүрүлүп, кимдир бирөөнүн бакчасына айланган (фоторепортаж)

ЦИРК - МАДАНИЯТТЫН БИР БУТАГЫ

Ар бир адам майрам күндөрү үй-бүлөсү, жоро-жолдоштору менен маданий жайларга эс алууга шашылат. Кимдир бирөө эстрадалык ырларды жактырса, кимдир бирөө опера ырчыларынын ырын уккусу келет. Ал эми дагы бирөө цирктеги чимирилип ойногон өнөрпоздордун оюнун көргүсү келет.

Бүгүнкү күндө цирктин күйөрман, көрөрмандары арбын. Кыргыз мамлекеттик цирки 1976-жылдан бери иштеп келет, бирок анын бүгүнкү абалы канааттандырарлык эмес. Анда иштеген кызматкерлер бүгүн, 24-июнда жыйын өткөрүшүп, мамлекеттик циркте бир да жолу оңдоо иштери болбогондугун, тегерегине ар кандай жер-жемиштер айдалганын айтышкан. Айтылган сөздөрдүн чын-төгүнүн билүү үчүн кызматкерлер менен чогуу имаратты көздөй бет алдык.

Мамлекеттик циркте жалпысынан 45 кызматкер эмгектенет. "Учурда цирктин абалы абдан оор. 40 жылдан бери капиталдык оңдоп-түзөө иштери өткөрүлгөн эмес. Имараттын алдында гүл өстүрүүнүн ордуна сарымсак, капуста эгилип, бүтүндөй кыргыз элине уят болдук. Советтер Союзунун убагында кыргыз цирки бүтүндөй союздук республикалардын ичинен алдынкы орунда турчу. Азыр талкаланып урап баратабыз", - дейт Кыргыз Республикасынын Эл артисти Кадырбек Тажиев.

Чынында, цирктин тегереги кадимки жер-жемиш айдалган эң жакшы багылган бакчадай болсо, имараттын бетиндеги жазуулар бейбаштар жашаган шаардагы имараттын элесин жаратат. Мындан улам "Бул жакты көзөмөлдөп, иретке келтирчү адам жокпу?" деген суроо туулду. Мамлекеттик имараттын аймагында жер-жемиштердин өстүрүлүшү өзгөчө таң калтырды.

Кыргыз Республикасынын Президенти Алмазбек Атамбаевге жана кыргыз элине цирк кызматкерлеринин кайрылуусу: "Урматтуу кыргыз эли! Урматтуу президент! Тарых жана маданият жылында цирк кызматкерлерин сактап калгыла. Кырылып кетмей болдук. Урматтуу кыргыз эли, маданий жайлардын бири болгон цирктин айланасын ыплас иштерден тазалаганга жардам бериңиздер. Шаардын так ортосунда жайгашкан имараттын айланасына капуста, сарымсак эгилип, бүтүндөй кыргыз элине, маданиятты түшүнгөн дүйнө элине уят болдук. Биз үчүн ыйык болгон маданий жайыбызды түнкүсүн сойкулар каптап, абийирден кеттик. Маданиятты түшүнбөгөн жетекчи келип, абалыбыз оор".

ЦИРКТИН ИЧИНДЕГИ ЖАНЫБАРЛАРДЫН КЫГЫ БИР КАНЧА УБАКЫТТАН БЕРИ ҮЙҮЛҮП ЖАТАТ

"Цирктин айланасын чөп басып, тазалаган адам жок. Акыркы убакта цирк талкаланып жок болуп баратат. Маданият жана туризм министри Алтынбек Максүтов министрлик кызматка келгенден бери цирк кызматкерлери менен бир да жолу жолугуп, абалыбызды сураган жок. Биздин абалыбызды сурабай эле койсун. Мамлекеттик цирктин абалын көрүүгө кызыккан жок", - дейт режиссёр Клара Тажиева.

"Учурда цирк кызматкерлери 3600 сомдон 4000 сомго чейин айлык алышат. Арабызда 18 жылдан бери ижара үйдө жашагандар бар. Циркте акыйкат жок. Айланасы кытайларга кафеге берилип, кытайлар сарымсак, капуста өстүрүп, балык багып жатышат. Имараттын короосунда бир канча убакыттан бери жаныбарлардын кыгы алынбай жатат. Бул деген шермендечилик!" - деди башкы машыктыруучу Анарбек Айталиев.

Цирктин сырткы көрүнүшү эле көңүл оорутса, ичи да адамды кейитет. Балдарды машыктыруучу жайдын полундагы линолеум сыйрылып, астынкы катмары көрүнүп калган.

Кээ бир ички дубалдарынын кара шыбагы көрүнүп, айрым электр лампалары эбак иштебей калган. Мындан сырткары кээ бир бөлмөлөрүндө электр жарыгы такыр эле жок.

Алыстан жашынакай, жакындан жан кейиткен, тегереги бирөөнүн бакчасына айланган шаардын борборундагы мамлекеттик цирктин бүгүнкү абалы эртең жакшырып калат деген оюбуз менен коштошпой туралы...