Кикбоксчу Алексей Федосеев франциялык спортчуга утулуп, "Дүйнө чемпиону" наамынан кол жууду

24-июнда Франциянын Монако шаарында кыргыз кикбоксчусу Алексей Федосеев кикбокстун К-1 түрүнөн WAKO-PRO версиясы боюнча чемпиондук наамын коргоо үчүн рингге чыкты. Спортчу франциялык
Дилан Сальвадорго каршы туруп, техникалык нокаут менен утулуп калды.

Беттеш "Monte-Carlo Fighting Masters" мелдешинин алкагында уюштурулган. Беттештин 3-раундунда атаандаштын чыканагы Алексейдин кашына тийип, кан ага баштады. Дарыгерлер беттештин жүрүшүнө аралашып, токтотууну суранышты. Жыйынтыгында техникалык нокаут менен Алексей жеңилип калды.

Спортчубуз беттеш тууралуу ой бөлүштү: "Кикбокстун К-1 түрүндө чыканак менен чабууга катуу тыюу салынган. Дал ушул көрүнүш беттештин жүрүшүнө таасир тийгизди. Бул күнү мен тажрыйба топтоп, тажрыйбалуу мушкерлер менен тааныштым".