Евро-2016: Италия курамасы Испанияны утуп, Европанын учурдагы чемпионун мелдештен үйүнө "айдады" (фоторепортаж)

Футбол боюнча учурдагы Европа чемпиону Испания курамасы чемпиондук наамын коргой алган жок. Испан футболчулары Франциядагы Европа чемпиондугунун жарым чейрек финалында Италия курамасына утулуп калышты. "Стад де Франс" стадионунда өткөн беттеш 2:0 эсебинде аяктап, Италия чейрек финалга жолдомо алды.

Алгачкы тайм италиялыктардын артыкчылыгы астында өттү. Италиялыктар дарбазага узатылган соккулардын саны боюнча гана алдыга чыкпастан, эсеп катыштыгында да алдыга чыгышты. 33-мүнөттө Жоржо Кьеллини эсепти ачты. 2-таймда испаниялыктар оюндун ылдамдыгын арттырып, уюштурулган чабуулдардын санын арттырды. Бирок бул атаандаштын коргонуусун жарып кирип, эсепти теңегенге жетиштүү болгон жок. Каршы чабуулда ойногон Италия курамасы оюндун негизги убактысына 4 мүнөт кошулганда идеалдуу чабуул уюштурду. Бул чабуул Грациано Пелленин голу менен аяктады.

Жыйынтыгында Испания курамасы мелдештен четтеп калды. Чейрек финалга чыккан Италия курамасы 2-июлда Германия курамасы менен беттешмекчи.

Чейрек финалдагы атаандаштар:

30-июнь. Польша-Португалия

1-июль. Уэльс-Бельгия

2-июль. Германия-Италия

3-июль. Франция-Англия/Исландия