Ысык-Көлдө 12 пансионат ишмердүүлүгүн токтотту

Ысык-Көлдө 12 пансионат ишмердүүлүгүн токтотконун 28-июнда Мамлекеттик экологиялык-техникалык инспекциянын Ысык-Көл облусундагы башкармалыгынын башчысы Талант Борочоров SUPER.KG'ге билдирди.

"Бостери айылында жайгашкан "Асыл-Таш" жана "Береке" пансионаттары экологиялык талаптарга жооп бербегендиктен жабылды. Аталган эс алуу жайлары чет элдик эс алуучуларды кабыл алууга даяр эмес. Ошондуктан ушундай кадамдарга бардык. "Асыл-Таш" пансионаты экс-депутат Равшан Жээнбековдун жубайына таандык", - деп айтты Борочоров.

"Береке" эс алуу жайына 2015-жылы эскертүү берилип, бир айлык мөөнөт ичинде экологиялык талаптарды жана өрт коопсуздугун жөнгө салуу керектиги айтылган. Бирок коюлган талаптар ишке ашырылган эмес Ошондуктан айып салып, кемчиликтерди иретке келтиргенче ишмердүүлүгүн токтоттук. Ысык-Көл облусу боюнча бул эки пансионаттан тышкары дагы 10 пансионат ишин токтотту", - деп кошумчалады ал.

Белгилей кетсек, "Асыл-Таш" эс алуу жайы 2015-жылы мамлекетке 1 миллион 664 765 сом салык төлөгөн.