30 айда 80ден ашуун бала түрдүү кыйынчылыктарга кабылган. 7 жаштан өйдө 24 кыз сексуалдык зордуктоого туш болгон

30 айда 80ден ашуун бала түрдүү кыйынчылыктарга кабылган. 7 жаштан өйдө 24 кыз сексуалдык зордуктоого туш болгон. Бул тууралуу бүгүн, 28-июнда Балдарды коргоо борборунун кызматкерлери маалымат жыйынында билдиришти.

Балдарды коргоо борборунун аткаруучу директору Мира Итикеева: "Балдар түрдүү көйгөйлөргө кабылышат. Үй-бүлөдөгү зомбулук, сексуалдык зордуктоолорго туш болушат. Бирок ата-энелери, туугандары бул нерсеге көз жумуп коюшат", - деди.

"Балдарга карата зомбулукту токтотолу!" долбоорунун максаты - балдардын зордук-зомбулукка кабылган көйгөйлөрүнө коомчулуктун көңүлүн буруу. Долбоор башталгандан бери жаңы конуштардагы мектептерде зомбулуктун алдын алуу, шектүү жагдайларда эмне кылуу керек деген маселе боюнча балдардын ата-энелери, достору, коомчулуктун өкүлдөрү менен иш алып бардык.

30 айдын ичинде биздин борборго турмуштун түрдүү кыйынчылыктарына кабылган 80ден ашуун бала кайрылды. Алардын 50 пайызы кыздар, 7 жаштан өйдө 24 кыз зордуктоого кабылган. Бул жабык тема болгондуктан, канча жаш бала түрдүү зомбулукка кабылганы тууралуу так маалымат жок. Себеби көпчүлүгү айтышпайт, жашырып коюшат", - деп билдирди маалымат жыйынында долбоордун менеджери Майрам Тилебалиева.