Мамлекеттик каттоо кызматы 7 миллион 460 миң АКШ долларына барабар долбоорго кол койду

Бүгүн, 28-июнда Кыргыз Республикасынын Өкмөтүнө караштуу Мамлекеттик каттоо кызматы менен Корея Республикасынын Эл аралык кызматташуу агенттигинин ортосунда биометрикалык паспорттук системди киргизүүчү долбоорго кол коюлду. Бул тууралуу аталган кызматтын басма сөз кызматы билдирди.

Гранттык негиздеги долбоор 7 миллион 460 миң АКШ долларын түзөт. Долбоордун башкы максаты -биометрикалык ID-карталардын жардамы менен шайлоодогу ачыктыкты жана мамлекеттик кызматтардын сапатын жакшыртуу.

"Шайлоо процессин жакшыртуу үчүн бирдиктүү мамлекеттик реестрдин экинчи планын аткаруу иштери жүрүп жатат. 2017-жылы өтө турган президенттик шайлоодо жарандардын шайлоо укугун коргоо максатында жарандарды идентификациялоо үчүн пайдаланылат. Бул долбоор KOICA`нын жардамы менен ишке ашат", - деди Тайырбек Сарпашев.

Тайырбек Сарпашев мамлекеттик кызматтарды электрондук форматта берүү үчүн биометрикалык технологиялардын негизинде адамдын өздүгүн аныктоочу универсалдуу аспап түзүү керектигин айтты. Өз кезегинде KOICA жетекчиси Пак Сунжи бул долбоордун маанилүү экенин белгиледи.