ТИМ: Стамбулдагы жардырууда жаракат алгандардын арасында кыргыз жарандары бар болушу мүмкүн (окуя болгон жерден кадрлар)

Түркиянын Стамбул шаарындагы "Ататүрк" аэропортундагы эки жардыруудан жаракат алгандардын арасында кыргыз жарандары бар болушу мүмкүн. Бул тууралуу Тышкы иштер министрлигинен кабарлашты. "28-июнь күнү Стамбулдан Бишкекке саат 21:35те жана 00:35те эки аба каттамы бар болгон. Түркиялык авиакомпаниянын жүргүнчүлөрү 19:35 жана 22:35те каттоодон өтүшмөк. Жабыр тарткандардын арасында каттоодон өтүп жаткан кыргыз жарандары бар болушу ыктымал. Учурда аталган каттамдарга билет алган кыргыз жарандарынын саны такталууда", - деп билдиришти министрликтин маалымат кызматынан.

Эскерте кетсек, 28-июнь күнү Түркиянын жергиликтүү убактысы боюнча саат 22:00 чамасында "Ататүрк" аэропортундагы эл аралык каттамдар терминалында эки жардыруу орун алган. Анын кесепетинен каза болгондордун саны 36га, жаракат алгандардын саны 147ге жеткен. Алардын арасында чет элдик жарандар да бар болгон.