Стамбулдагы жардыруудан жаракат алгандардын арасындагы 17 жаштагы Бактияр Юнусов кыргыз жараны болуп чыкты

Стамбулдагы жардыруудан жаракат алгандардын арасында бир кыргыз жараны бар экенин Кыргыз Республикасынын Стамбул шаарындагы башкы консулу Руслан Молдакунов 29-июнда SUPER.KG'ге билдирди. Учурда жаракат алган 17 жаштагы кыргыз жараны Бактияр Юнусов ооруканада жатат. Ал сол колунан жаракат алган. Юнусов бүгүн ооруканадан чыга турганын Тышкы иштер министрлигинин маалымат кызматынан билдиришти.

Тышкы иштер министрлиги буга чейин: "Стамбулдагы Башкы консулдуктун кызматкерлери жардыруу болгондон бери күнү-түнү ошол жерде туруп, тактоо иштерин жүргүзүшүүдө. Түркиянын Саламаттык сактоо министрлигинин кризистик борборунун маалыматы боюнча, жабыркагандарын арасында 17 жаштагы Бактияр Юнусов жана 20 жаштагы Рыфат Салимов аттуу жарандар бар экендиги кабарланууда. Учурда биздин кызматкерлер аталган эки жарандын жарандыгын тактап жатышат. Эгер биздин жарандар болуп чыкса, бардык жардамдарды көрсөтүшөт", - деп билдирген эле.

20 жаштагы Рыфат Салимов Өзбекстандын жараны болуп чыкты.

Эскерте кетсек, 28-июнь күнү Түркиянын жергиликтүү убактысы боюнча саат 22:00 чамасында "Ататүрк" аэропортундагы эл аралык каттамдар терминалында эки жардыруу орун алган. Анын кесепетинен каза болгондордун саны 36га, жаракат алгандардын саны 147ге жеткен.