Жогорку Кеңеште жаңы депутат ант берди

Бүгүн, 30-июнда Жогорку Кеңештин жыйынында жаңы депутат Максат Эгембердиев ант берди. Андан соң төрага Чыныбай Турсунбеков депутаттардын атынан анын ишине ийгилик, чың ден соолук, узун өмүр каалады.

Айта кетсек, кечээ Максат Эгембердиев КСДП фракциясынан Жогорку Кеңешке депутат болуп бекитилип, ага Жогорку Кеңештин депутаттык төш белгиси жана күбөлүгү берилген. Эгембердиев КСДПнын БШКга берген тизмеси боюнча Галина Скрипкинанын ордуна депутат болуп келди.

Эгембердиев Максатбек Бакирович 1970-жылы Жалал-Абад шаарында туулган. Үй-бүлөлүү, 6 баланын атасы. Жогорку билими бар: Дене тарбия кыргыз мамлекеттик институтун машыктыруучу-окутуучу адистиги боюнча бүтүргөн.

1991-1996-жылдары - Жалал-Абаддагы Олимпиада резервинин балдар-өспүрүмдөр спорттук мектебинде машыктыруучу болуп иштеп эмгек жолун баштаган;

1996-2004-жылдары - жеке ишкер;

2004-2009-жылдары - Жалал-Абад шаардык кеңешинин депутаты;

2011-2012-жылдары - Р.Санатбаев атындагы №3-Олимпиада резервинин балдар-өспүрүмдөр спорттук мектебинин директору;

2012-жылдан баштап бүгүнкү күнгө чейин Жалал-Абад шаардык кеңешинин депутаты болгон.

Жетишкендиктери:

Грек-рим күрөшү боюнча СССРдин Спорт чебери, КРнын ардактуу машыктыруучусу, Билим берүүнүн отличниги, Дене тарбия жана спорт боюнча КРнын отличниги.

2009-жылдан тарта Жалал-Абад облусундагы Грек-рим күрөшү боюнча федерациянын президенти.

2011-жылы билим берүүнү өнүктүүгө салым кошкону үчүн КРнын Билим берүү жана илим министрлиги тарабынан Ардак грамота менен сыйланган.