Банктын ишмердигине нааразы болгондордун тиешелүү документтери жок болгондуктан, алар менен келишим жокко чыгарылган

"Демир банкка" нааразы болгондор тиешелүү документтерин көрсөтө албагандыктан, алар менен келишим жокко чыгарылган. Бул тууралуу бүгүн, 30-июнда маалымат жыйынында "Демир банктын" башкы менеджери Шевки Сарылар билдирди.

"Митингге чыгып нааразычылык көрсөткөндөр бизди негизсиз айыптоодо, анткени бул компания менен иштешүүгө бел байлаганбыз. Алар үчүн эсеп ачып бергенбиз, бирок алар банктын тартибине ылайык Кыргыз Республикасынын Өкмөтү менен түзүлгөн келишимди жана Кытай өлкөсүнөн тапкан инвесторлор менен түзүлгөн келишим документин бизге көрсөтө алышкан жок", - деп билдирди Шевки Сарылар.

Эскерте кетсек, Бишкекте 29-июнда "Эркин заман" турак жай курулуш кооперативинин мүчөлөрү жана ал аркылуу үй алууну көздөгөн тургундар "Демир банк" инвесторлор жана башка банктар менен да иштешүүгө тоскоолдук жаратып жатат деген нааразычылыктар менен митингге чыгышкан.