Түркиялык басылмалар 43 адамдын өмүрүн алган жардырууну уюштургандардын сүрөттөрүн жарыялашты

Бүгүн, 30-июнда түркиялык басылмалар Стамбул шаарындагы "Ататүрк" аэропортунда 43 адамдын өмүрүн алган жардырууну уюштургандардын сүрөттөрүн жарыялашты. "Haber Turk" басылмасынын маалыматына таянсак, жардыруу уюштурган 3 адамдын бири Орусиянын жараны (Чечен Республикасынын тургуну) О.В экендиги аныкталды. Алар 32 күн мурун Сириянын түндүгүндөгү Эр-Ракка шаарынан Түркияга келип, Стамбулдагы Рахим районунан ижарага батир алып жашап турушкан.

Алар жардыруу уюштурардан мурун аэропортко кирип келе жатканда аэропорттун байкоочу камерасына түшүп калышкан.

Эскерте кетсек, 28-июнь күнү Түркиянын жергиликтүү убактысы боюнча саат 22:00 чамасында "Ататүрк" аэропортундагы эл аралык каттамдар терминалында эки жардыруу орун алган. Ошондой эле аэропорттун унаа токтотуучу жайында атышуу болгон. Анын кесепетинен каза болгондор 43, жаракат алгандар 147ге жеткен. Жаракат алгандардын арасында 17 жаштагы кыргыз жараны Бактияр Юнусов да бар. Ал сол колунан жеңил жаракат алган, кечээ ооруканадан чыгарылмак.