ТИМ. "Стамбулдагы жардырууну уюштурган 3 адамдын бири кыргыз жараны" деген маалымат такталган жок

Буга чейин түркиялык ММКлар Стамбулдагы 43 адамдын өмүрүн алган жардырууну уюштурган 3 адамдын бири кыргыз жараны болушу мүмкүн экенин жазып жатышкан. КРнын Тышкы иштер министрлигинин маалымат кызматы аталган маалымат такталбаганын 30-июнда билдирди. "Консулдуктун кызматкерлери Стамбулдун Террорчулукка каршы кызматынын өкүлдөрү менен жолугушту. Аталган кызмат бул маалыматты тастыктаган жок", - деп билдирди министрликтен.

Айрым маалыматтарга караганда, өзүн өзү жардырган 3 адам тең Чечен Республикасынан чыккандар болгон. Учурда алардын өздүгүн аныктоо үчүн экспертизалык топ иштеп жатат.

"Haber Turk" басылмасынын маалыматына таянсак, жардыруу уюштурган 3 адамдын бири Орусиянын жараны (Чечен Республикасынын тургуну) О.В экендиги аныкталган. Алар 32 күн мурун Сириянын түндүгүндөгү Эр-Ракка шаарынан Түркияга келип, Стамбулдагы Рахим районунан ижарага батир алып жашап турушкан.

Алар жардыруу уюштурардан мурун аэропортко кирип келе жатканда аэропорттун байкоочу камерасына түшүп калышкан.

Эскерте кетсек, 28-июнь күнү Түркиянын жергиликтүү убактысы боюнча саат 22:00 чамасында "Ататүрк" аэропортундагы эл аралык каттамдар терминалында эки жардыруу орун алган. Ошондой эле аэропорттун унаа токтотуучу жайында атышуу болгон. Анын кесепетинен каза болгондор 43кө, жаракат алгандар 147ге жеткен. Жаракат алгандардын арасында 17 жаштагы кыргыз жараны Бактияр Юнусов да бар. Ал сол колунан жеңил жаракат алган, кечээ ооруканадан чыгарылды.