Евро-2016: Португалия курамасы пенальтилер сериясында Польшаны утуп, жарым финалга чыкты (фоторепортаж)

1-июлга караган түнү Франциядагы Европа чемпиондугунун алгачкы чейрек финалы орун алды. Марсель шаарындагы "Велодром" стадионунда Польша жана Португалия курамалары кез келишти. Анда негизги убакыт жана кошумча 30 мүнөттүк убакытта 1:1 эсебиндеги тең чыгуу катталды. Пенальтилер сериясында Португалия курамасы 5:3 эсебинде утуп, жарым финалга жолдомо алды. Беттеште польшалык футболчулар биринчи болуп эсепти ачышты. 2-мүнөттө Роберт Левандовски айырмаланды. Эсеп 33-мүнөттө теңелди. 18 жаштагы Ренату Санчес алыстан топту дарбаза торуна жиберип, Европа биринчилигинде бул баскычта гол жараткан эң жаш футболчу катары рекорд койду.

Калган убакытта күйөрмандар гол көрө алышкан жок. 11 метр аралыктан сокку узатууда эки команданын тең өкүлдөрү жаңылган жок. Төртүнчү болуп сокку узаткан Якуб Блащиковски дарбазанын оң бурчун көздөй сокку узатканда дарбазачы Руй Патрисиу топту тосуп калды. Чечүүчү пенальтини Рикарду Куарежма ийгиликтүү голго айлантты. Эсеп - 5:3 жана Португалия жарым финалга чыкты.

Жарым финалда Португалия курамасы Уэльс-Бельгия курамаларынын жеңүүчүсү менен беттешет. Жарым финалдык беттеш 6-июлга белгиленген. Чейрек финалдагы оюндар:

30-июнь. Польша-Португалия - 1:1 (пенальтилер сериясында 5:3)

1-июль. Уэльс-Бельгия

2-июль. Германия-Италия

3-июль. Франция-Исландия