Боом капчыгайында унаа жолду ылай аралаш суу каптады

Боом капчыгайында Бишкек-Торугарт унаа жолунун 139-чакырымын ылай аралаш суу каптады. Бул тууралуу бүгүн, 1-июлда Өзгөчө кырдаалдар министрлигинин басма сөз кызматы билдирди.

“Ылай аралаш суунун жолду каптоосуна бүгүн түштө катуу жааган жамгыр себеп болгон. Учурда ал жерде №32-Жол тейлөө ишканасынын кызматкерлери иштөөдө. Ошондой эле зыяндарды тактоо иштери жүрүп жатат”, - деп билдирди ӨКМнын басма сөз кызматы.

Транспорт жана жол министрлиги тарабынан атайын техникалар тартылып, калдыктарды тазалоо иштери жүрүүдө. Учурда унаа жолдун бир тарабы ачык.